Kamouraska no Salón Teatro de Santiago de Compostela despois de pasar por Colombia, Venezuela, México e Brasil

Publicado por marta

 

INVERSA TEATRO VOLTA A GALICIA CON KAMOURASKA DESPOIS DE PASAR POR BRASIL, COLOMBIA, MÉXICO E VENEZUELA.

A representación será o 1 de Xuño ás 20:30 horas no Salón Teatro de Santiago de Compostela.

Poderase ver esta montaxe en Galicia  despois do seu paso por Colombia, Venezuela, México e Brasil

A compañía Inversa Teatro presenta no Salón Teatro a peza Kamouraska.  A obra, dirixida por Vanesa Sotelo e interpretada polas actrices Beatriz Campos, María Caparrini e Marta Pérez, Kamouraska poderá verse o sábado 1 de xuño no Salón Teatro de Santiago de Compostela ás 20:30 horas.

Kamouraska preséntase de novo en Galicia logo de pasar o ano pasado  por Brasil e de realizar unha xira dun mes por Colombia, e de estar novamente este ano en Colombia, México e Venezuela onde realizaron talleres e actuacións repartidas por diferentes festivais e ciudades dos diferentes países.

Foto de Rafa Pasadas- Fundación Autor.

Proxección latino-americana

Kamouraska vén avalada pola boa acollida de crítica e público nos diferentes Festivais, mostras e teatros nos que estivo tanto no 2012 como neste mesmo ano. De igual forma, o interese que suscitou a compañía deu lugar a outros convites en Festivais de países como Uruguay, Colombia, México, Ecuador e Cuba. Por elo, Inversa está sumerxida en novas producción que a levarán de novo a latino-américa. Unha destas producións é Té con Kant, peza de teatro íntimo creada e interpretada por María Caparrini e Marta Pérez que xa posúe convites de diferentes países.

KAMOURASKA

Kamouraska é un lugar mental no que as súas tres habitantes (entre humanas e caninas) teñen a posibilidade de reinventar un universo con regras propias no que o xogo é rirse da infelicidade para ser feliz. O desequlibrio entre a necesidade e a imposibilidade de amar, de pertencer a un lugar e de soñar, dá pé a un espectáculo de corte contemporáneo e carácter asociativo que procura o riso como vía de escape ante o violento acto de existir. Pensada como unha comedia cruel dentro dunha traxedia subterránea, Kamouraska ofrece once embates percorridos de excentricidade, elementos grotescos e desenfadados que desembocan nun cambio de pel das actrices en escena.

Inversa Teatro

Inversa Teatro é unha compañía de teatro profesional fundada en 2009 por Marta Pérez e que xa conta con catro producións nun exemplo de incesante actividade. A aposta polos novos creadores e creadoras, a posta en valor do feminino e a convivencia de diferentes linguaxes nos seus proxectos son algunhas das claves de Inversa que, despois de Expostas, A illa das mulleres loucas e Kamouraska  e Paper Dolls: un espectáculo escrito e dirixido por Lola Correa que inclúe o documental Paper Dolls.doc sobre o proceso creativo da peza e que conta coa dirección de Manu Paz.

 

Inversa inicia en abril a súa xira por Venezuela, México e Colombia.

Publicado por marta

      INVERSA TEATRO INICIA EN ABRIL UNHA XIRA POR VENEZUELA, MÉXICO E COLOMBIA COA PEZA KAMOURASKA

A xira realizarase entre os días 2 de Abril e 2 de Maio.

Percorrerán diferentes Festivais e cidades  como o Festival Gran Caribe en Cartagena de Indias, o Festival Somos Más de Caracas e o Teatro Experimental de Jalisco.

A compañía de Galicia- España, Inversa Teatro realizará unha xira con 6 representacións 6 talleres escénicos repartidas polos paises de Venezuela, México e Colombia durante todo o mes de abril. Nesta estancia dun mes, presentarán a peza Kamouraska, dirixida por Vanesa Sotelo e interpretada polas actrices Beatriz Campos, María Caparrini e Marta Pérez. Kamouraska poderá verse nos escenarios do Teatro Pedro de Heredia en Cartagena de Indias, dentro do Festival Gran Caribe, na Sala Ana Julia Rojas de UNEARTE, en Caracas dentro do Festival Somos Más e no Teatro Experimenal de Jalisco en México.

A xira que Inversa ten prevista polo tres países foi posible grazas á firme aposta que  os propios teatros e Festivais latinoamericanos realizaron; así, a compañía obtivo axuda da Embaixada de España en Venezuela, do Festival Gran Caribe de Colombia e da Axencia Española de Cooperación Internacional para el Desenvolvimiento (AECID) de Cartagena de Indias-Colombia.

Este é a terceira viaxe que Inversa Teatro fai a latinoamérica despois de pasar pola VII Mostra Latino Americana de Teatro de Grupo de São Paulo en abril do ano pasado e de realizar unha xira dun mes por Colombia onde realizaron 7 representacións e 7 talleres escénicos por diferentes lugares do país como Bogotá, Bucaramanga, Tunja, Vila de Leyva e Cartagena de Indias. O interese que suscitou a peza en Brasil e en Colombia deu lugar a que outros países se interesasen pola Compañía e así foi como resultou convidada neste tres países arriba mencionados. Ademais, Inversa  Teatro ten agora mesmas máis invitacións para este 2013 en países como Uruguay, Venezuela, México, Ecuador, Brasil, Colombia, Chile e Cuba.

Proxección latino-americana

Kamouraska vén avalada pola boa acollida de crítica e público na VII Mostra Latino Americana de Teatro de Grupo de São Paulo que tivo lugar en abril e polos diferentes teatros e festivais colombianos. Agora, Inversa está a realizar unha firme aposta por continúar abrindo mercado en latinoamerica, ante o claro desmantelamento que as Artes Escénicas están a sufrir en España debido á forte crise que axexa a ese país.

TALLERES ESCÉNICOS

Ademais da obra teatral Inversa tamén realizará diferentes actividades paralelas nos Festivais onde está convidada. As actividades que oferta son Talleres de creación das artes escénicas desde unha perspectiva de xénero que impartirá a directora da Compañía, Marta Pérez, Talleres de teatro para nenos que ofrecerá a actriz María Caparrini e contacontos que realizará a actriz de Kamouraska e tamén contacontos Beatriz Campos.

DATAS

A peza Kamouraska poderá verse o día 5 de abril no Teatro Pedro de Heredia en Cartaxena de Indias, dentro do Festival Gran Caribe. Ademais Beatriz Campos terá dúas sesións de contos neste Festival os días 4 e 6 de Abril. Pola súa banda, María Caparrini impartirá o seu taller de teatro para nenos o día 6 de abril na sede da Axencia Española de Cooperación Internacional para el Desenvolvimiento (AECID), lugar e día no cal tamén Marta Pérez impartirá o seu taller de xénero nas Artes Escénicas.

Tras o seu paso por Colombia porán rumbo a Jalisco-Guadalajara, onde exporán a peza Kamouraska no Teatro Experimental de Jalisco os días 19, 20 e 21 de abril.

Á súa volta de México, Inversa estará presente en Caracas, na Sala Ana Julia Rojas de UNEARTE, en Caracas dentro do Festival Somos Máis- que organiza a Embaixada de España en Venezuela- os días 27 e 28 de abril. Tras estes dous días de representación Inversa realizará os días 29, 30 e 1 de maio os seus talleres de creación das artes escénicas desde unha perspectiva de xénero.

Inversa participa no novo número da Revista Galega de Teatro

Publicado por marta

Inversa Teatro participa no número 73 da Revista Galega de Teatro que acaba de saír á rúa, co artigo «Tomar as rendas e crear á inversa: unha perspectiva feminista da creación escénica en Galicia» escrito por Marta Pérez e Vanesa Sotelo.

Este artigo é o resultado do convite recibido para participar no XVI Encontro de mulleres de Iberoamérica nas Artes Escénicas do FIT de Cádiz e tamén quedará plasmado na futura publicación das Actas do encontro.

A aparición nos últimos anos dun nutrido número de creadoras escénicas que en Galicia comezan a dirixir os seus proxectos e presentar os seus universos, serviu como excusa para realizar unha panorámica das creadoras galegas, acompañada por unha reflexión sobre a evolución do logos patriarcal. O documento abre unha serie de traballos sobre o teatro e feminismo que se completará no próximo número da Revista Galega de Teatro coa mirada de creadoras doutros puntos do estado.

Máis información en: http://www.revistagalegateatro.com/

*NOTA: Algunhas persoas solicitaron non aparecer nomeadas no artigo por non estar de acordo coa visión presentada nel.

Vive o nadal á Inversa

Publicado por marta

Inversa
Adxetivo:
Alterada, transtornada, oposta, contraria, invertida, inalterable.
Este nadal altérate, transtórnate, oponte, contráriate, invírtete, inaltérate!!
Grazas por estar aí porque me dades a constante alegría de saber que existo.
O meu mellor sorriso para vós nestas festas e no 2013!
Festa, saúde, amor e teatro!!
Marta.
«La esperanza es el sueño del hombre despierto.» (Aristóteles)

Inversa Teatro no Culturgal

Publicado por marta

Inversa Teatro estará presente na Feira Galega das Industrias Culturais 2012- Culturgal- este venres 30 de Novembro ás 20:00 horas no espacio do «Patio» do Pazo de Cultura de Pontevedra presentando o seu taller Kamouraska: Un lugar para crear. Este taller é parte dos realizados pola compañía na xira que este ano fixo por Colombia e Brasil.

O sábado día 1 de Decembro ás 18 horas Inversa tamén foi convidada por Escena Galega para estar presente na mesa redonda  A nova escena en Galicia, xunto con membros das Compañías galegas Voadora e Elefante Elegante.

Aproveitamos para informarvos que Inversa Teatro está preparando para o 2013 a xira polos diferentes Festivais e teatros nos que foi convidada: Ecuador, Brasil, Uruguay, Colombia, Cuba, México e Washington e que quedará definida a principios de xaneiro.

Horarios do curso Arte, Natureza e Teatro con Inversa Teatro

Publicado por marta

Horarios, inscripcións e honorarios do curso Arte, Natureza e Teatro con Inversa Teatro os días 24 e 25 de Novembro do 2012 no Castelo de Soutomaior

Imparte o Curso:
Marta Pérez & María Caparrini.

Honorarios:
20 € por persoa. Estes honorarios non inclúen as comidas nin as durmidas.
A organización pode propor un lugar barato para comer e para durmir.

Inscripcións:
690 084 625 // 686 909 591 // 629 818 199

Horarios:
Sábado 24 de Novembro:

10-11,30h: presentación.

12-14h: entrenamento cos viewpoints.

14:30-16:30h. -Comida do grupo nun lugar próximo. Cada participante pagará a súa comida

16:30-20h: traballo creativo en base ao entrenamento.
Domingo 25 de Novembro:

10-12h: Repaso do traballo creativo do día anterios

12-14 horas: Mostra dos diferentes traballos e posta en común

14:30-16:30 – Comida do grupo nun lugar próximo. Cada participante pagará a súa comida


–

Inversa realiza o curso Arte, Natureza e Teatro

Publicado por marta

Inversa Teatro impartirá o curso Arte, natureza e teatro que se realizará os días 24 e 25 de Novembro no Castelo de Soutomaior, encadrado dentro dos cursos de Arte e Natureza que o Grupo Arou ven organizando desde hai dez anos por toda Galicia. Os cursos están orientados en xeral a creadoras e creadores e nel traballaremos os puntos de vista escénicos ou viewpoints -teorizados por Anne Bogart-  a partires de composicións espaciais que nos ofreza a propia relación coa natureza.

Este evento de Arte, natureza e teatro conta co apoio da Deputación de Pontevedra.

DESCRIPCIÓN DO CURSO:

O curso de Arte, Natureza e Teatro quere achegar a diferentes creadores que habitualmente non traballen coas Artes Escénicas os chamados puntos de vista escénicos –viewpoints ou PVE-

Os PVE foron teorizados por Anne Bogart, directora artística do Saratoga International Theater Institute (SITI) e profesora asociada da Universidade de Columbia.

Os viewpoints ou PVE son puntos de concienciación  que o artista e creador establece durante o traballo. Son nomes que se dan a certos principios básicos de move

mento e que ofrecen unha linguaxe para falar sobre o que acontece ou funciona no escenario. Son nove categorías que poden coincidir parcialmente unhas con outras, dependendo da/do artista e do estilo da produción. Falamos entón de determinados traballos de composición que proporcionan unha estructura para a/o artista e polo tanto de ferramentas ao servizo da arte.

A linguaxe do escenario, como calquera outra linguaxe, pode expresar todo o que a imaxinación lle dicte a quen trata de expresar algo. Nesta ocasión, o escenario será o mundo físico da propia natureza e dependerá de cada un de nós e de como usar a linguaxe e o que poidamos expresar con ela.

Os PVE son unha estrutura para a práctica, para manter en forma, alerta e flexibles determinados “músculos”. A creadora e o creador, no caso dos PVE exercita o ser consciente, a destreza de escoitar con todo o corpo e un senso de espontaneidade e capacidade de extremar. Os PVE capacitan á/ó artista para atopar a posibilidade dalgo moito maior do que imaxinaran ao principio. Ao empregar os PVE permitímonos a sorpresa, a contradicción e o impredecible.

Logo de adestrar cos PVE ven o traballo de composición, entendido coma unha metodoloxía para xerar, definir e desenvolver o vocabulario teatral que se vai empregar nun determinado acto escénico. A composición desvela os nosos propios pensamentos e sentimentos ocultos acerca do material.

Para este novo encontro de Arte, Natureza e Teatro imos dispor de tódalas posibilidades que nos ofrece a natureza e empregalas para a composición de pezas escénicas de pequeno formato, utilizando a técnica dos PVE e outros parámatros de composición. Cada un dos participantes pode traer na memoria un pequeno texto, versos ou reflexións para xogar dentro deste espazo. Traballarase en grupos, non sendo isto unha condición sine qua non pero sí desexable.

Os PVE son unha filosofía do movemento traducida en técnica para:

a)       Instruír creadores en xeral.

b)      Crear movemento no escenario, sexa cal sexa este.

Imparte o curso: María Caparrini e Marta Pérez

Coste do curso: 20 €
Inscripcións: 690 084 625 //629818199

Inversa no XVI encontro de Mulleres de Iberoamérica nas Artes Escénicas no FIT de Cádiz

Publicado por marta

Marta Pérez e Vanesa Sotelo foron convidadas a participar neste encontro de mulleres dentro do Festival Iberoaméricano de Teatro de Cádiz, onde puideron presentar un pequeno fragmento interpretativo da peza Expostas, ademáis da ponencia que leva por título «Tomar las riendas y crear a la Inversa. Una perspectiva feminista de la creación teatral en Galicia«

No encontro, este ano titulado «Después de la Pepa. Intervenciones Teatrales» en homenaxe á celebración do bicentenario da promulgación da Constitución de 1812, Inversa puido atoparse con participantes chegados de 14 países: Arxentina, Bolivia, Brasil, Chile, Costa Rica, Colombia, Cuba, Ecuador, México, Nicaragua, Portugal, Uruguay, Venezuela e España.

A ponencia que puidemos ofrecer, onde se menciona un grande número de mulleres creadoras no panorama teatral galego, será publicada no próximo número da Revista Galega de Teatro.

Inversa Teatro na V edición do FITO de Ourense (Festival Internacional de Teatro de Ourense)

Publicado por marta

Inversa Teatro estará presente nesta nova edición do Fito de Ourense que se realizará entre o 5 e o 20 de Outubro deste 2012. A peza que levará a escena Inversa Teatro será Kamouraska e a presentación realizarase o próximo 17 de Outubro ás 20:30 horas no Teatro Principal de Ourense.

Posteriormente a esta actuación, Marta Pérez e Vanesa Sotelo foron convidadas os días 19-20 e 21 de Outubro ó FIT de Cádiz (Festival Iberoamericano de Teatro de Cádiz) a dar a ponencia que leva por título » Tomar las riendas y crear a la Inversa. El diálogo Feminista», onde ademáis presentarán un pequeno fragmento interpretativo da peza Expostas.

Kamouraska