Té con Kant en Gondomar e Vigo

Volve o espectáculo de Té con Kant a novos escenarios galegos. Nesta ocasión poderemos ver a peza o sábado 7 de xuño no Auditorio Lois Tobío de Gondomar ás 21 horas e o venres 13 de xuño na A.C. Bou Eva de Vigo.

Té con Kant é un espectáculo escrito e dirixido por María Caparrini e Marta Pérez. É un proxecto experimental que conxuga o ensaio filosófico e a creación escénica xogando co humor e a ironía para obter unha peza de teatro íntimo próxima ao formato de teatro-didáctico-conferencia.

Johanna Gottfried e Theodora Krauss son dúas mulleres ilustradas chegadas á nosa época nunha viaxe no tempo desde a Prusia do S. XVIII. Unha vez aquí tentarán exercer como axitadoras filosóficas coa pretensión de remover e promover a reflexión (e acción) do público asistente ao redor da problemática moral nos nosos días, a partires das ideas do seu amigo o filósofo Inmanuel Kant. A última decisión sobre o destino destas personaxes dependerá unicamente do público asistente. Atréveste a pensar con nós?